السلام عليكم ورحمة الله تعالى وبركاته
هادي وفة ديال المافن معمرين بنوتيلا فحالهوم كيتباعو بماكدونالدز وهاد الوصفة رائعة و كتجي لذيذة جربتها وعجبت ولادي بزااف نتمنى تعجبكم
المقادير :
_ 12 معلقة صغيرة نوتيلا
_100 غ زبدة رطبة
_2 بيضات بدرجة حرارة المطبخ
_ياغورت طبيعي
100 مليلتر حليب
_100 غ سكر صقيل
_250 غ دقيق ابيض ممتاز
_ خميرة الحلويات 1
_قبصة ملح
_100 غ حبوب الشكلاط
_فاني
الطريقة :
_اولا كنديرو 12 معلقة صغيرة ديال نوتيلا مفارقين اي معلقة صغيرة حدى الاخرى فوق ورق الزبدة و ندخلوها للمجمد بساعة قبل هي غادي تكون الحشو
_ كنسخنو الفران على 180 درجة
_كندوبو الزبدة و نخليوها تبرد شوية
_ كناخدو البيض و نطربوه بالطراب اليدوي مع السكر و الفاني و الملح ثم كنضيف الزبدة مع الحريك ثم كنضيف الياغورت الطبيعي ثم الدقيق و الخميرة مغربلين و نخلطو مزيان و فالاخير كنضيفو حبوب الشكلاط و نخلطو مزيان
_ كناخدو مول المافن ائري و كنصبو شوية من الخليط و نجبدو نوتيلا من المجمد و نحطو كل كويرة فوق خليط المافن ثم نرجعو نغطيو نوتيلا بالخليط الباقي حتى متبقاش تبان نوتيلا
_ ثم كندخلوها للفران الي سخناه من قبل بين 15 الى 20 دقيقة حتى تبان ليكون طابت و تحمرات و تخرجوها تخليوها شوية ترتاح عاد حيدوها من المول وديروها فوق ورق او منديل و غير تبرد شوية غطيوها بمنديل و ديروها فبلاستيكة باش ترجع ترطاب هادي من تجربتي يلا خليتيها عريانة غادي تيبس من الجناب
نتمنى الوصفة تعجبكم
